"Багануур” ХК-ийн цахим хуудсанд зочилж буй танд энэ өдрийн мэнд хүргэе. Багануурын уурхай үүсэн байгуулагдсан цагаасаа улсынхаа гал голомтыг манаж, дүүргийнхээ хөгжлийн түүчээ болон 40 дахь жилдээ үйл ажиллагаагаа амжилттай явуулж байна.

БИ ХОЖИЖ ЯВАА НЭГЭН

Намайг Дугарын Цэрэнтогтох гэдэг. Би одоо 18 настай. “Багануур” ХК-ийн Технологийн Автомашины засварын хэсэгт токарьчин хийдэг. Уурхайн хамгийн балчир нэгэн. Надтай чацуу залуусын ихэнх нь 12 дугаар ангийн сурагч, харин зарим нь нэгдүгээр дамжааны оюутан. Би уурхайд ажиллаад есөн сар болжээ. Загинуулахдаа загинуулаад, магтуулахдаа магтуулаад есөн сарыг өнгөрөөчихжээ. Шинжлэх Ухаан Технологийн Их сургууль Механик Тээврийн сургуулийн Мэргэжлийн сургалт үйлдвэрлэлийн төвийг төгсөнгүүтээ ажлын гараагаа эндээс эхлүүлсэн юм. Анх ажилд ороод механикуудаас хамгийн их айдаг байсан. Буруу хийчих вий гэсэн айдастай, түүний зэрэгцээ аюулгүй ажиллагааг эрхэмлэхийн үүднээс удаан хийснээр гараас юм гардаггүй, тэгээд л загинуулах вий гэсэн давхар айдас байдаг байлаа. Одоо ажил минь гарт орсон. Мөн уурхайн ах нар надтай ахын дүү, ахын дүү гээд их сайхан харьцдаг. Ажил хийвэл ам тосддогийг үеийнхэн минь надаар үлгэрлэн хараасай. Зарим хүүхдүүд эцэг эх хоёр замыг нь заалаа гэдэг. Миний явж буй энэ замыг тэд л зааж сонгож өгсөн. Тэдний сонгож өгсөн зам миний хувьд буруу байгаагүй. Би тэдэндээ маш их баярладаг. Би хүний зэрэгтэй явж байна шүү дээ. Энд би хүн хүндлэх, хүндлэл гэдгийн наадах шинж чанарыг биш мөн чанарыг ойлгож авсан. Дөрвөн жилийн дараа үеийнхэн минь сургуулиа төгсөөд амьдралд дөнгөж хөл тавиад ажлын гараагаа эхлүүлэх гэж байхад би аль хэдийнэ таван жилийн ажлын туршлагатай мундаг токарьчин болоод байж байна шүү дээ.
Та юу чадахаар байна, түүнийгээ тултал нь хийх хэрэгтэй. Ажил хүнийг хэзээ ч голдоггүй.

 

АРЫН АЛБЫГ ХАРИУЦЛАГАТАЙ ХАШДАГ УУРХАЙЧИН ЭЭЖҮҮД

Ээжийг гэртээ ирэхэд гэр дүүрээд аав, дүү, бид инээд хөөр, баяр баяслаар бялхаж, бяцхан гэрт минь багташгүй их гэрэл гэгээ цугладаг билээ. Ээж гэдэг гэрийг гийгүүлэгч, хамаг ажлыг амжуулагчид. Ээжид чаддаггүй, мэддэггүй юм гэж байдаггүй. Ажил дээр ч, амьдрал дээр ч “арын албыг” хариуцлагатай хашдаг уурхайчин ээжүүд.

Захиргаа ахуй үйлчилгээний тасгийн ажилчид. Тэд баяр ёслол, томоохон арга хэмжээ, хүлээн авалт зохион байгуулах, бэлэн болгох үйл явц бүрд, хамт олноороо ар даан тэргүүн эгнээнд ажилладаг. Тэд 18 уулаа. 18 уулаа хүлээсэн үүрэг хариуцлагаа бүрэн ухамсарлан хамт олноороо нэгэн бүл болж ажилладаг.

“Болж бүтнэ дээ” гэдэг үгийг “амныхаа уншлага” болгон явдаг Л.Азжаргал бол гурван хүүгийн ээж. Урьд нь барилгын засалчин хийдэг байсан тэрээр Багануурын уурхайд ороод гурван сар болж буй уурхайчин бүсгүй.
“Барилгын заслын ажил улирлын шинжтэй. Уурхайн ажил тогтмол болохоор маргааш яах бол, нөгөөдөр яах билээ гэсэн бодол тээх шаардлагагүй. Уурхайчин байх, уурхайчин ээж байна гэдэг хүүхдүүдийн минь хувьд бахархал билээ. Тийм болохоороо би уурхайчин болсондоо сэтгэл хангалуун байдаг”

Уурхайчны эхнэр Ш.Отгонхишиг. Тэрээр гурван хүүхдийнхээ уурхайчин ээж нь. Уурхайчин ээж аавтай хүүхдүүд нь алс хэтдээ уурхайчин болох хүсэл мөрөөдөлтэй.
“Хүүхдүүдтэй ажиллана гэдэг сайхан. Цэцэрлэгийн багшаас уурхайчин болсон. Ханьтайгаа нэгэн дээвэр дор Багануурын их уурхайд мөр зэрэгцэн хамтдаа ажиллаж яваадаа би бахархдаг юм”

Алдарт эхийн одонт 28хан настай, даруухан дөлгөөхөн Л.Мөнхзул маань уурхайн нэг гишүүн болоод таван жилийг ардаа орхижээ.
Түүний хүүхдүүддээ болон хүмүүст хандан хэлэх дуртай үг нь “Мэргэжил бүхэн сайхан. Хүн л ажлыг, цалинг голдгоос мэргэжил, ажил хүнийг голдоггүй” гэнэ лээ.

Б.Энхсайхан насны хувьд, зан аашын хувьд бусдадаа үлгэр дуурайл болохуйц нэгэн. Ажил дээр ч амьдрал дээр ч түүнээс “гэр бүлийнх” нь гишүүд туслалцаа авдаг гэсэн шүү. Гурван хүүгийн ээж, дархан бэр тэрээр бүх зүйлд сэтгэл зүрхнээсээ ханддаг. Түүний эрхэм болгон хэлдэг үг нь “Сэтгэл байхад бүх зүйл аандаа бүтдэг хорвоо”

 

ХӨДӨЛМӨРЧ НЭГНИЙ БОДОЛ АМИЛДАГ

Намайг Бадарчийн Мягмар-Од гэдэг. Би энэ их уурхайд ажиллаад 11 жил болох гэж байна. Уурхайд би ажиллахыг хүсч мөрөөддөг байлаа…Би 1989 онд Хэнтий аймгийн Мэргэжил сургалт үйлдвэрийн төвийг мужаанчаар төгссөн. Арав гаруй жилийн өмнө Юдэг гэдэг газарт нүүж ирээд удаагүй байхад нэг өдөр эхнэрийн минь бие муудсан юм. Ганц хором ч орхиж явж болохгүй эхнэрээ аваад хот суурин газар бараадсан нь Багануур хот байсан юм. Ирээд л уурхайд ажиллах юмсан гэсэн бодолтой болж тэр бодлоо тээсээр өдөр хоногийг өнгөрөөдөг боллоо.
Эхнэр маань зургаан сарын турш хэвтэрт байх болж таних ганц ч хүнгүй энэ газарт айлын бранк хөлслөөд бүх зүйлийг дахин тэгээс эхлэх шаардлагатай болсон юм. 

Нэг өдөр Багануур Сувиллын “байшин бариулна” гэсэн зарыг олж харав. Зарын дагуу очоод Багануур Сувиллын дарга байсан Лхагважав гэдэг хүнтэй уулзаад ажлаа эхлэх болсон юм. Хэрлэн голын эрэг дээр гүүний саамны сувиллын байшинг барихын төлөө би өөрийнхөө чаддаг бүхнээ зориулсан. Тэр хүнтэй тэгэж танилцаж, өөрийнхөө хэрхэн хөдөлмөрлөж чаддагаа харуулсан тэр өдрөөс миний ажлын гараа эхэлсэн. Хөдөлмөрлөж чадсан болохоор “Багануурын их уурхайд ажиллах юмсан” гэсэн бодлоо бодит болгож чадсан бөгөөд хөдөлмөр л намайг тэр хүнтэй уулзуулсан билээ.

Одоо би өвдсөн ч ажилдаа ирээд хамт олонтойгоо инээж наргиад суумаар байдаг юм.

Юуг чадахаар байна, юуг хиймээр байна, түүнийгээ л хийх хэрэгтэй. Юуг хийвэл та хүний зэрэгтэй, хүнээс дутахааргүй явахаар байна түүнийгээ сонгоод түүндээ бүх сэтгэл зүрхээ зориулаад нэг үзээрэй. Хөдөлмөр хүнийг хэзээ ч хуурдаггүй. Хэзээ ч…
Та болно доо гээд хэвтээд байвал амьдрал чинь дээшлэхгүй. Хүсэл мөрөөдлийнхөө төлөө хөдөлмөрлөсөн нэгний бодол нь амилдаг гэдгийг би амьдралаараа батална.

 

#ЭЕРЭГЭЭР_ЦЭНЭГЖ 1100 САНАА, 1100 АЖИЛ

Намайг Алимаа гэдэг. Би Багануур Хувьцаат Компанид хувцас хүлээн авагч, олгогч хийдэг.

Миний өглөө хамгийн гоё бөгөөд хамгийн ачаалал ихтэйгээр эхэлдэг. Би угаах хувцас хүлээн авна, тоолно, шуудайлна гээд өдөр тутамдаа нэг л ажил хийдэг. Харин тэр өдрөөс өдөр тутмынхаа ажлыг эхлэхдээ шинийг санаачилсан, ажлаа хөнгөвчилсөн байдлаар хийхийг хичээдэг болсон.
Яагаад гэвэл саяхан би, 8 дугаар сарын 25-нд Арлын Япон орныг хамт олонтойгоо, 19үүлээ зорьсон юм. Тэндээс тээж ирсэн сайхан зүйлс болоод үзэж харсан зүйл их арвин. Япон хүний нэгнээ хүндлэх хүндлэл, угталт үдэлт, нэг нэгэндээ үзүүлж буй найрсаг харилцаа нь үнэхээр бахдам. Энэ миний тэндээс, Япон хүнээс олж авсан, өөрөөсөө эхлэн бусдадаа үлгэр дуурайлал болох ёстой чадвар байсан.

Японд хүмүүс хүссэн газраа тамхи татдаггүй. Харин энд өөр. Тиймд би, бид, манай хамт олон компанийн захиргааны гадна хэсэгт тамхи татах цэг өөрсдийн нөөц бололцоогоор байгуулахаар төлөвлөсөн.

ӨӨРЧЛӨЛТИЙГ ӨӨРӨӨСӨӨ ЭХЭЛЖ ХАМТДАА ХӨГЖИЦГӨӨЕ.

#ЭЕРЭГЭЭР_ЦЭНЭГЖ 1100 САНАА, 1100 АЖИЛ

Бид ундааны сав, лааз түүдэг хүмүүсийн уранхай ноорхой хувцасыг нь л эхэлж хардаг. Гэтэл тэр хүмүүс бусдын хаясан хогийг түүгээд хоёрдогч түүхий эд авдаг газарт аваачдаг.

Олон жил газрын хөрснөө шингэхгүй тэр зүйлийг түүгээд дахин боловсруулахаар өгч буй тэр хүмүүсийг байгаль орчинд ээлтэй зүйл хийж байна гэсэн өнцгөөр харах хэрэгтэй.

Намайг Онгоодойн Мөнхтуяа гэдэг. Би Багануур Хувьцаат компанид экологич инженер хийдэг. Би уурхайд 2006 оноос хойш 12 дахь жилдээ тасралтгүй ажиллаж байна. 2017 оны 05 сард “Хог хаягдлын тухай хууль” шинэчлэгдэн батлагдсан. Тус хуульд хог хаягдлыг ангилан ялгах тухай зааж өгсөн. Тэгсэн атлаа улсын хэмжээнд хог хаягдлыг дахин боловсруулах газар маш ховор. Албан байгууллага, хувь хүн хог хаягдлаа ангилсан ч төвлөрсөн хогийн цэг нь ангилагдаагүйгээс нийлээд хаягддаг. Одоо манай улсад цаас, хоёрдогч түүхий эдийг л зөвхөн буцаан авдаг. 14 жилийн өмнө Япон Улсад намайг очиход хог гурваас дөрвөн төрлөөр ялган ангилагдаж дахин боловсруулагддаг байсан. Жишээлбэл, хоол хүнсний хаягдлаар бордоо, ундааны савны хаягдлаар ажлын хувцас гэхчилэн хог хаягдлын ихэнх хувийг үр ашигтайгаар боловсруулдаг байсан юм.
Харин өнөөдөр Япон улсад хог хаягдлыг бүх төрлөөр ангилан ялгаж байна. Зорилтот хөтөлбөрөөр яваад ирсний дараа би уурхайн хэмжээнд хог хаягдлыг ангилж хаядаг болгоё гэсэн санаагаа хэрэгжүүлэхээр ажиллаж байна.

ӨӨРЧЛӨЛТИЙГ ӨӨРӨӨСӨӨ ЭХЭЛЖ ХАМТДАА ХӨГЖИЦГӨӨЕ

Wagner Asia
Komit
Mera
Za mine